KLSD ਕਾਲਜ ਵਿਖੇ ‘ਇਨੋਵੇਸ਼ਨ: ਆਰਥਿਕ ਵਿਕਾਸ ਲਈ ਇੱਕ ਰਾਮਬਾਣ’ ਵਿਸ਼ੇ ‘ਤੇ ਸੈਮੀਨਾਰ

ਲੁਧਿਆਣਾ : ਕਮਲਾ ਲੋਹਟੀਆ ਐਸਡੀ ਕਾਲਜ ਲੁਧਿਆਣਾ ਵਿਖੇ ਆਈਸੀਐਸਐਸਆਰ-ਐਨਡਬਲਿਊਆਰਸੀ ਸਪਾਂਸਰਡ ਇਕ ਦਿਨਾ ਰਾਸ਼ਟਰੀ ਸੈਮੀਨਾਰ ‘ਇਨੋਵੇਸ਼ਨ: ਇਕ ਰਾਮਬਾਣ ਫਾਰ ਇਕਨਾਮਿਕ ਡਿਵੈਲਪਮੈਂਟ’ ਵਿਸ਼ੇ ‘ਤੇ ਕਰਵਾਇਆ ਗਿਆ। ਸੈਮੀਨਾਰ ਦਾ ਵਿਸ਼ਾ ਬਦਲਦੇ ਵਿਸ਼ਵ-ਵਿਆਪੀ ਦ੍ਰਿਸ਼ ਵਿੱਚ ਨਵੀਨਤਾਵਾਂ ਦੀ ਲੋੜ ਦਾ ਮੁਲਾਂਕਣ ਕਰਨ ਅਤੇ ਆਰਥਿਕ ਵਿਕਾਸ ਦੀ ਗਤੀ ਵਿੱਚ ਨਵੀਨਤਾਵਾਂ ਦੀ ਮੁੱਖ ਭੂਮਿਕਾ ਨੂੰ ਪਛਾਣਨ ਦੇ ਦੁਆਲੇ ਘੁੰਮਦਾ ਹੈ।

ਵੱਖ-ਵੱਖ ਕਾਲਜਾਂ ਤੋਂ 120 ਪ੍ਰਤੀਭਾਗੀਆਂ ਅਧਿਆਪਕਾਂ, ਖੋਜ ਵਿਦਵਾਨਾਂ, ਵਿਦਿਆਰਥੀਆਂ ਨੇ ਸੈਮੀਨਾਰ ਵਿੱਚ ਆਪਣੀ ਐਂਟਰੀ ਕੀਤੀ। ਪ੍ਰਿੰਸੀਪਲ ਪ੍ਰੋ ਸੰਦੀਪ ਚਾਨਾ ਨੇ ਆਏ ਮਹਿਮਾਨਾਂ ਅਤੇ ਪਤਵੰਤਿਆਂ ਦਾ ਰਸਮੀ ਸਵਾਗਤ ਕੀਤਾ। ਸੈਮੀਨਾਰ ਦੀ ਰਸਮੀ ਸ਼ੁਰੂਆਤ ਦੀਵੇ ਜਗਾ ਕੇ ਕੀਤੀ ਗਈ ਅਤੇ ਇਸ ਤੋਂ ਬਾਅਦ ਡਾ ਸੰਜੀਵ ਕੁਮਾਰ ਸ਼ਰਮਾ, ਪ੍ਰੋਫੈਸਰ, ਯੂਆਈਏਐਮਐਸ, ਪੀਯੂ, ਚੰਡੀਗੜ੍ਹ ਨੇ ਮੁੱਖ ਭਾਸ਼ਣ ਦਿੱਤਾ। ਆਪਣੇ ਸੰਬੋਧਨ ਵਿੱਚ, ਉਨ੍ਹਾਂ ਨੇ ਭਾਰਤ ਨੂੰ ਇੱਕ ਨਵਾਂ ਪਾਵਰਹਾਊਸ ਦੱਸਿਆ ਜੋ ਸਥਿਰਤਾ ਦੇ ਉੱਭਰਦੇ ਆਯਾਮਾਂ, ਜਿਸ ਵਿੱਚ ਨਵੀਨਤਾਵਾਂ ਦੀ ਮੁੱਖ ਭੂਮਿਕਾ ਹੈ, ਦੀ ਪਾਲਣਾ ਕਰਕੇ ਆਪਣੀ ਸ਼ਾਨ ਮੁੜ ਹਾਸਲ ਕਰ ਰਿਹਾ ਹੈ।

ਇਸ ਤੋਂ ਬਾਅਦ ਪੀ ਯੂ ਚੰਡੀਗੜ੍ਹ ਦੇ ਈਵਨਿੰਗ ਸਟੱਡੀਜ਼ ਵਿਭਾਗ ਦੀ ਪ੍ਰੋਫੈਸਰ ਡਾ ਵੰਦਨਾ ਮੈਣੀ ਨੇ ਪ੍ਰਧਾਨਗੀ ਭਾਸ਼ਣ ਦਿੱਤਾ।, ਉਸਨੇ ਭਾਰਤ ਨੂੰ ਹਰ ਖੇਤਰ ਵਿੱਚ ਉੱਤਮ ਬਣਾਉਣ ਲਈ ਸੰਮਲਿਤ ਨਵੀਨਤਾਵਾਂ ਦੀ ਜ਼ਰੂਰੀਤਾ ਬਾਰੇ ਗੱਲ ਕੀਤੀ। ਪਹਿਲੇ ਤਕਨੀਕੀ ਸੈਸ਼ਨ ਦੀ ਪ੍ਰਧਾਨਗੀ ਡਾ ਹਰਪ੍ਰੀਤ ਕੌਰ, ਪ੍ਰੋਫੈਸਰ ਅਤੇ ਡਾਇਰੈਕਟਰ, ਕੇਆਈਐੱਮਟੀ, ਲੁਧਿਆਣਾ ਨੇ ਕੀਤੀ ਜਦਕਿ ਦੂਜੇ ਤਕਨੀਕੀ ਸੈਸ਼ਨ ਦੀ ਚੇਅਰਪਰਸਨ ਡਾ ਮੋਨਿਕਾ ਸ਼ਾਰਦਾ, ਐਸੋਸੀਏਟ ਪ੍ਰੋਫੈਸਰ, ਐਮਟੀਐਸਐਮ ਕਾਲਜ ਫਾਰ ਵੂਮੈਨ, ਲੁਧਿਆਣਾ ਨੇ ਕੀਤੀ।

ਲਗਭਗ 30 ਅਧਿਆਪਕਾਂ ਅਤੇ ਖੋਜ ਵਿਦਵਾਨਾਂ ਨੇ ਵੱਖ-ਵੱਖ ਖੇਤਰਾਂ ਜਿਵੇਂ ਕਿ ਮਾਰਕੀਟਿੰਗ, ਵਿੱਤ, ਸੰਚਾਰ, ਪ੍ਰਾਹੁਣਚਾਰੀ, ਆਈਟੀ, ਕਾਰੋਬਾਰ, ਸੋਸ਼ਲ ਮੀਡੀਆ, ਖੇਤੀਬਾੜੀ ਅਤੇ ਊਰਜਾ ਸੰਭਾਲ ਵਿੱਚ ਨਵੀਨਤਾ ਦੀ ਭੂਮਿਕਾ ‘ਤੇ ਧਿਆਨ ਕੇਂਦਰਿਤ ਕਰਦੇ ਹੋਏ ਆਪਣੇ ਖੋਜ ਪੱਤਰ ਪੇਸ਼ ਕੀਤੇ। ਪੀਏਯੂ ਲੁਧਿਆਣਾ ਦੇ ਪ੍ਰੋਫੈਸਰ ਡਾ ਸੰਦੀਪ ਕਪੂਰ ਸਮਾਪਤੀ ਸੈਸ਼ਨ ਦੇ ਚੇਅਰਪਰਸਨ ਸਨ। ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਬੱਚਿਆਂ ਵਿੱਚ ਸ਼ੁਰੂ ਤੋਂ ਹੀ ਸਿਰਜਣਾਤਮਕਤਾ ਅਤੇ ਨਵੀਨਤਾ ਪੈਦਾ ਕੀਤੀ ਜਾਣੀ ਚਾਹੀਦੀ ਹੈ ਕਿਉਂਕਿ ਇਸ ਨਾਲ ਉਨ੍ਹਾਂ ਨੂੰ ਭਵਿੱਖ ਵਿੱਚ ਦੇਸ਼ ਦੇ ਜਨਸੰਖਿਆ ਲਾਭ ਵਜੋਂ ਵਿਕਾਸ ਵਿੱਚ ਲਾਭਕਾਰੀ ਯੋਗਦਾਨ ਪਾਉਣ ਵਿੱਚ ਮਦਦ ਮਿਲੇਗੀ।