ਪੰਜਾਬੀ
ਪੀ.ਏ.ਯੂ. ਦੇ ਵਾਈਸ ਚਾਂਸਲਰ ਨੇ ਤਸਵੀਰ ‘ਪੀ.ਏ.ਯੂ. ਦਾ ਮੋਰ’ ਕੀਤੀ ਜਾਰੀ
ਲੁਧਿਆਣਾ : ਪ੍ਰਸਿੱਧ ਵਕੀਲ ਅਤੇ ਕੁਦਰਤ ਕਲਾਕਾਰ ਸ ਹਰਪ੍ਰੀਤ ਸਿੰਘ ਸੰਧੂ ਵੱਲੋਂ ਤਿਆਰ ਕੀਤੇ ਮੋਰ ਦੇ ਵੱਡੇ ਪੋਰਟਰੇਟ ਨੂੰ ਪੀ.ਏ.ਯੂ. ਦੇ ਵਾਈਸ ਚਾਂਸਲਰ ਡਾ. ਸਤਿਬੀਰ ਸਿੰਘ ਗੋਸਲ ਨੇ ਆਪਣੇ ਕਮੇਟੀ ਰੂਮ ਵਿੱਚ ਰਿਲੀਜ਼ ਕੀਤਾ। ਡਾ. ਐਮ. ਐਸ. ਕੰਗ, ਸਾਬਕਾ ਵਾਈਸ-ਚਾਂਸਲਰ, ਫੈਕਲਟੀ ਅਤੇ ਵਿਦਿਆਰਥੀ ਵੀ ਇਸ ਮੌਕੇ ਹਾਜ਼ਰ ਸਨ।
ਸ. ਸੰਧੂ ਦੇ ਕੰਮ ਦੀ ਸ਼ਲਾਘਾ ਕਰਦਿਆਂ ਡਾ: ਗੋਸਲ ਨੇ ਕਿਹਾ ਕਿ ਪੰਛੀਆਂ ਅਤੇ ਜਾਨਵਰਾਂ ਦੀਆਂ ਫੋਟੋਆਂ ਖਿੱਚਣ ਲਈ ਬਹੁਤ ਮੁਹਾਰਤ ਦੀ ਲੋੜ ਹੁੰਦੀ ਹੈ। ਉਨ੍ਹਾਂ ਕਿਹਾ ਕਿ ਸੰਧੂ ਨਾ ਸਿਰਫ਼ ਆਪਣਾ ਕੰਮ ਕਰ ਰਹੇ ਹਨ, ਸਗੋਂ ਉਹ ਆਪਣੇ ਕੰਮ ਰਾਹੀਂ ਯੂਨੀਵਰਸਿਟੀ ਦਾ ਪ੍ਰਚਾਰ ਵੀ ਕਰ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਸ. ਸੰਧੂ ਨੇ ਡਾ. ਟੀ ਐੱਸ ਸਟਨ ਦੀ ਸਟਨ ਹਾਊਸ ਵਿੱਚ ਤਸਵੀਰ ਨੂੰ ਨਵਿਆਉਣ ਦਾ ਵਡਮੁੱਲਾ ਕੰਮ ਕੀਤਾ ਹੈ ।
ਡਾ. ਐੱਮ. ਐੱਸ. ਕੰਗ ਨੇ ਕਲਾਕਾਰ ਨੂੰ ਉਸ ਦੇ ਸੁੰਦਰ ਕੰਮ ਲਈ ਵਧਾਈ ਦਿੱਤੀ ਅਤੇ ਉਸ ਨੂੰ ਫੋਟੋਗ੍ਰਾਫੀ ਦੇ ਹੁਨਰ ਦੀ ਖੋਜ ਜਾਰੀ ਰੱਖਣ ਲਈ ਉਤਸ਼ਾਹਿਤ ਕੀਤਾ। ਸ. ਸੰਧੂ ਨੇ ਦੱਸਿਆ ਕਿ ਜਦੋਂ ਉਨ੍ਹਾਂ ਨੇ ਇਹ ਤਸਵੀਰ ਯੋਗ ਵੀਸੀ ਨੂੰ ਦਿਖਾਈ ਤਾਂ ਉਨ੍ਹਾਂ ਨੇ ਤੁਰੰਤ ਕੈਪਸ਼ਨ ‘ਪੀ.ਏ.ਯੂ. ਦਾ ਮੋਰ’ ਸੁਝਾਇਆ। ਇਹ ਤਸਵੀਰ ਹਾਲ ਹੀ ਵਿੱਚ ਪੰਜਾਬ ਦੇ ਮਾਣਯੋਗ ਰਾਜਪਾਲ ਸ੍ਰੀ ਬਨਵਾਰੀ ਲਾਲ ਪੁਰੋਹਿਤ ਨੂੰ ਭੇਂਟ ਕੀਤੀ ਸੀ ।
