ਪੰਜਾਬੀ
Meritorious Schools : ਲੁਧਿਆਣਾ ‘ਚ 11ਵੀਂ ਜਮਾਤ ਲਈ ਸਿਰਫ਼ 5 ਸੀਟਾਂ ਖਾਲੀ, ਰੈਗੂਲਰ ਕਲਾਸਾਂ ਸ਼ੁਰੂ
ਲੁਧਿਆਣਾ : ਸੂਬੇ ਭਰ ਵਿੱਚ ਮੈਰੀਟੋਰੀਅਸ ਸੁਸਾਇਟੀ ਵੱਲੋਂ ਚਲਾਏ ਜਾ ਰਹੇ ਮੈਰੀਟੋਰੀਅਸ ਸਕੂਲਾਂ ਵਿੱਚ ਕਲਾਸਾਂ ਸ਼ੁਰੂ ਹੋ ਗਈਆਂ ਹਨ। ਪੰਜ ਦਿਨਾਂ ਤੱਕ ਚੱਲੀ ਕੌਂਸਲਿੰਗ ਤੋਂ ਬਾਅਦ ਬੇਸ਼ੱਕ ਹਰ ਸਕੂਲ ਵਿੱਚ ਕੁਝ ਸੀਟਾਂ ਖਾਲੀ ਰਹਿ ਗਈਆਂ ਹਨ ਪਰ ਰੈਗੂਲਰ ਕਲਾਸਾਂ ਸ਼ੁਰੂ ਕਰ ਦਿੱਤੀਆਂ ਗਈਆਂ ਹਨ।
ਲੁਧਿਆਣਾ ਦੇ ਮੈਰੀਟੋਰੀਅਸ ਸਕੂਲ ਦੀ ਗੱਲ ਕਰੀਏ ਤਾਂ ਇਸ ਸਮੇਂ 11ਵੀਂ ਜਮਾਤ ਦੀਆਂ ਵੱਖ-ਵੱਖ ਸਟਰੀਮ ਦੀਆਂ ਸਿਰਫ਼ ਪੰਜ ਸੀਟਾਂ ਹੀ ਖਾਲੀ ਹਨ, ਜਿਨ੍ਹਾਂ ਵਿੱਚੋਂ ਤਿੰਨ ਮੈਡੀਕਲ, ਇੱਕ ਨਾਨ-ਮੈਡੀਕਲ ਅਤੇ ਇੱਕ ਕਾਮਰਸ ਸਟਰੀਮ ਹੈ। ਗਿਆਰ੍ਹਵੀਂ ਜਮਾਤ ਦੀਆਂ ਕੁੱਲ 500 ਸੀਟਾਂ ਜਿਨ੍ਹਾਂ ਵਿੱਚੋਂ 300 ਨਾਨ-ਮੈਡੀਕਲ, 100 ਮੈਡੀਕਲ ਅਤੇ 100 ਕਾਮਰਸ ਦੀਆਂ ਸੀਟਾਂ ਹਨ, 495 ਸੀਟਾਂ ਭਰ ਗਈਆਂ ਹਨ।
ਲੁਧਿਆਣਾ ਮੈਰੀਟੋਰੀਅਸ ਸਕੂਲ ਦੀ ਪ੍ਰਿੰਸੀਪਲ ਵਿਸ਼ਵਦੀਪ ਕੌਰ ਨੇ ਦੱਸਿਆ ਕਿ ਸਕੂਲ ਵਿੱਚ 11ਵੀਂ ਜਮਾਤ ਦੀਆਂ 495 ਸੀਟਾਂ ਭਰੀਆਂ ਗਈਆਂ ਹਨ। ਜਿਨ੍ਹਾਂ ਵਿਦਿਆਰਥੀਆਂ ਦੀਆਂ ਪੰਜ ਸੀਟਾਂ ਖਾਲੀ ਹਨ, ਉਨ੍ਹਾਂ ਨੂੰ ਸਕੂਲ ਵਿੱਚ ਰਿਪੋਰਟ ਕਰਨ ਲਈ ਇੱਕ ਹਫ਼ਤੇ ਦਾ ਸਮਾਂ ਦਿੱਤਾ ਗਿਆ ਹੈ। ਉਨ੍ਹਾਂ ਮੁਤਾਬਕ ਇਹ ਸਮਾਂ ਇਸ ਲਈ ਦਿੱਤਾ ਗਿਆ ਹੈ ਕਿਉਂਕਿ ਵਿਦਿਆਰਥੀ ਦੂਰ-ਦੁਰਾਡੇ ਤੋਂ ਆਏ ਹੋਏ ਹਨ।