ਹੁਗਲੀ : ਪੱਛਮੀ ਬੰਗਾਲ ਦੇ ਹੁਗਲੀ ਜ਼ਿਲੇ ਦੇ ਪਾਂਡੂਆ ਇਲਾਕੇ ‘ਚ ਸੋਮਵਾਰ ਨੂੰ ਬੰਬ ਧਮਾਕਾ ਹੋਣ ਦੀ ਖਬਰ ਹੈ। ਇਸ ਘਟਨਾ ‘ਚ ਇਕ ਬੱਚੇ ਦੀ ਮੌਤ ਹੋ ਗਈ ਅਤੇ ਦੋ ਜ਼ਖਮੀ ਹੋ ਗਏ। ਮੀਡੀਆ ਰਿਪੋਰਟਾਂ ਮੁਤਾਬਕ ਬੱਚੇ ਬੰਬ ਨੂੰ ਗੇਂਦ ਸਮਝ ਕੇ ਖੇਡ ਰਹੇ ਸਨ, ਜਦੋਂ ਇਹ ਫਟ ਗਿਆ। ਜ਼ਖਮੀਆਂ ‘ਚੋਂ ਇਕ ਦਾ ਸੱਜਾ ਹੱਥ ਜਾਣ ਦੀ ਖਬਰ ਹੈ। ਟੀਐਮਸੀ ਸੰਸਦ ਅਭਿਸ਼ੇਕ ਬੈਨਰਜੀ ਸੋਮਵਾਰ ਨੂੰ ਇਸੇ ਖੇਤਰ ਵਿੱਚ ਇੱਕ ਚੋਣ ਰੈਲੀ ਨੂੰ ਸੰਬੋਧਨ ਕਰਨ ਜਾ ਰਹੇ ਹਨ।
ਅਭਿਸ਼ੇਕ ਬੈਨਰਜੀ ਦੀ ਸੋਮਵਾਰ ਨੂੰ ਪਾਂਡੂਆ ‘ਚ ਮੀਟਿੰਗ ਹੈ ਅਤੇ ਇਹ ਭਿਆਨਕ ਘਟਨਾ ਉਨ੍ਹਾਂ ਦੀ ਬੈਠਕ ਵਾਲੀ ਥਾਂ ਤੋਂ ਥੋੜ੍ਹੀ ਦੂਰੀ ‘ਤੇ ਵਾਪਰੀ। ਇਸ ਧਮਾਕੇ ਵਿੱਚ ਜ਼ਖ਼ਮੀ ਹੋਏ ਦੋ ਬੱਚਿਆਂ ਦੀ ਪਛਾਣ ਰੂਪਮ ਵੱਲਭ ਅਤੇ ਸੌਰਭ ਚੌਧਰੀ ਵਜੋਂ ਹੋਈ ਹੈ। ਇਨ੍ਹਾਂ ਸਾਰਿਆਂ ਦੀ ਉਮਰ 11 ਤੋਂ 13 ਸਾਲ ਦਰਮਿਆਨ ਹੈ। ਦੋਵੇਂ ਚੁੰਚੁਰਾ ਇਮਾਮਬਾੜਾ ਹਸਪਤਾਲ ‘ਚ ਇਲਾਜ ਅਧੀਨ ਹਨ।
ਸਥਾਨਕ ਸੂਤਰਾਂ ਮੁਤਾਬਕ ਸੋਮਵਾਰ ਸਵੇਰੇ ਕਰੀਬ 8:30 ਵਜੇ ਸਥਾਨਕ ਨਿਵਾਸੀਆਂ ਨੇ ਪਾਂਡੂਆ ਦੇ ਟਿੰਨਾ ਇਲਾਕੇ ‘ਚ ਇਕ ਛੱਪੜ ‘ਚੋਂ ਅਚਾਨਕ ਧਮਾਕੇ ਦੀ ਆਵਾਜ਼ ਸੁਣੀ। ਇਸ ਤੋਂ ਬਾਅਦ ਜਦੋਂ ਲੋਕ ਭੱਜ ਕੇ ਛੱਪੜ ਦੇ ਕੰਢੇ ਪੁੱਜੇ ਤਾਂ ਦੇਖਿਆ ਕਿ ਤਿੰਨ ਬੱਚੇ ਗੰਭੀਰ ਜ਼ਖਮੀ ਹਨ। ਤਿੰਨ ਵਿੱਚੋਂ ਦੋ ਬੱਚਿਆਂ ਦੀ ਹਾਲਤ ਨਾਜ਼ੁਕ ਬਣੀ ਹੋਈ ਹੈ, ਜਦਕਿ ਇੱਕ ਦੀ ਮੌਤ ਹੋ ਗਈ ਹੈ।
ਇਸ ਪੂਰੀ ਘਟਨਾ ਕਾਰਨ ਇਲਾਕੇ ‘ਚ ਸੋਗ ਦੀ ਲਹਿਰ ਹੈ। ਹੁਗਲੀ ਦਿਹਾਤੀ ਪੁਲਿਸ ਨੇ ਘਟਨਾ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਇਸ ਘਟਨਾ ਤੋਂ ਬਾਅਦ ਸੁਰੱਖਿਆ ਨੂੰ ਲੈ ਕੇ ਸਵਾਲ ਉੱਠਣੇ ਸ਼ੁਰੂ ਹੋ ਗਏ ਹਨ। ਚੋਣਾਂ ਤੋਂ ਪਹਿਲਾਂ ਅਜਿਹੇ ਧਮਾਕੇ ਅਤੇ ਜਾਨੀ ਨੁਕਸਾਨ ਵੱਡੇ ਸਵਾਲ ਖੜ੍ਹੇ ਕਰਦਾ ਹੈ। ਇਸ ਘਟਨਾ ਨੇ, ਖਾਸ ਤੌਰ ‘ਤੇ ਅਭਿਸ਼ੇਕ ਬੈਨਰਜੀ ਵਰਗੇ ਉੱਚ ਕੋਟੀ ਦੇ ਨੇਤਾ ਦੀ ਮੀਟਿੰਗ ਵਾਲੀ ਥਾਂ ‘ਤੇ ਸੁਰੱਖਿਆ ਵਿਚ ਕਮੀਆਂ ਵੱਲ ਇਸ਼ਾਰਾ ਕੀਤਾ ਹੈ।