500 ਭਾਰਤੀਆਂ ਸਮੇਤ 1200 ਕੈਦੀਆਂ ਨੂੰ ਰਿਹਾਅ ਕਰਨ ਦਾ ਐਲਾਨ: ਪ੍ਰਧਾਨ ਮੰਤਰੀ ਨੇ ਈਦ ਮੌਕੇ ਕੈਦੀਆਂ ਨੂੰ ਦਿੱਤੀ ਈਦ…..

ਸੰਯੁਕਤ ਅਰਬ ਅਮੀਰਾਤ (ਯੂਏਈ) ਦੇ ਰਾਸ਼ਟਰਪਤੀ ਸ਼ੇਖ ਮੁਹੰਮਦ ਬਿਨ ਜ਼ਾਇਦ ਅਲ ਨਾਹਯਾਨ ਨੇ ਇਸ ਸਾਲ ਫਰਵਰੀ ਦੇ ਅਖੀਰ ਵਿੱਚ ਇੱਕ ਮਹੱਤਵਪੂਰਨ ਘੋਸ਼ਣਾ ਕੀਤੀ। ਉਸ ਨੇ ਰਮਜ਼ਾਨ ਦੇ ਮੌਕੇ ‘ਤੇ ਕੈਦੀਆਂ ਨੂੰ ਵੱਡੇ ਪੱਧਰ ‘ਤੇ ਮੁਆਫ਼ੀ ਦੇਣ ਦੀ ਯੋਜਨਾ ਬਣਾਈ ਸੀ। ਇਸ ਫੈਸਲੇ ਤਹਿਤ ਰਮਜ਼ਾਨ ਖਤਮ ਹੁੰਦੇ ਹੀ 1,295 ਕੈਦੀਆਂ ਨੂੰ ਰਿਹਾਅ ਕਰਨ ਦੇ ਹੁਕਮ ਜਾਰੀ ਕੀਤੇ ਗਏ ਸਨ।ਇਸ ਤੋਂ ਇਲਾਵਾ ਯੂਏਈ ਦੇ ਪ੍ਰਧਾਨ ਮੰਤਰੀ ਸ਼ੇਖ ਮੁਹੰਮਦ ਬਿਨ ਰਾਸ਼ਿਦ ਅਲ ਮਕਤੂਮ ਨੇ 1,518 ਕੈਦੀਆਂ ਨੂੰ ਮੁਆਫ਼ੀ ਦੇਣ ਦਾ ਐਲਾਨ ਕੀਤਾ ਹੈ, ਜਿਨ੍ਹਾਂ ਵਿੱਚੋਂ 500 ਤੋਂ ਵੱਧ ਭਾਰਤੀ ਨਾਗਰਿਕ ਹਨ। ਇਹ ਰਿਹਾਈ ਵਿਸ਼ੇਸ਼ ਤੌਰ ‘ਤੇ ਰਮਜ਼ਾਨ ਅਤੇ ਈਦ ਦੇ ਪਵਿੱਤਰ ਮੌਕੇ ‘ਤੇ ਕੀਤੀ ਗਈ ਹੈ, ਤਾਂ ਜੋ ਕੈਦੀਆਂ ਨੂੰ ਨਵੀਂ ਜ਼ਿੰਦਗੀ ਅਤੇ ਆਪਣੇ ਪਰਿਵਾਰਾਂ ਨਾਲ ਬਿਤਾਉਣ ਦਾ ਮੌਕਾ ਮਿਲ ਸਕੇ।

ਇਨ੍ਹਾਂ ਕੈਦੀਆਂ ਨੂੰ ਰਿਹਾਅ ਕਰ ਕੇ ਯੂਏਈ ਨੇ ਨਾ ਸਿਰਫ਼ ਨਿਆਂ ਦੀ ਨਵੀਂ ਮਿਸਾਲ ਕਾਇਮ ਕੀਤੀ ਹੈ, ਸਗੋਂ ਇੱਕ ਮਾਨਵਤਾਵਾਦੀ ਪਹਿਲਕਦਮੀ ਵੀ ਕੀਤੀ ਹੈ, ਜੋ ਲੋਕਾਂ ਨੂੰ ਇੱਕ ਨਵਾਂ ਮੌਕਾ ਦੇਣ ਜਾ ਰਹੀ ਹੈ। ਹੁਣ ਇਹ ਕੈਦੀ ਰਮਜ਼ਾਨ ਅਤੇ ਈਦ ਦਾ ਤਿਉਹਾਰ ਆਪਣੇ ਪਰਿਵਾਰਾਂ ਨਾਲ ਮਨਾਉਣਗੇ।ਇਸ ਫੈਸਲੇ ਨੂੰ ਦੁਨੀਆ ਭਰ ਵਿੱਚ ਸਕਾਰਾਤਮਕ ਪ੍ਰਤੀਕਰਮ ਮਿਲਿਆ ਹੈ, ਖਾਸ ਤੌਰ ‘ਤੇ 500 ਭਾਰਤੀ ਨਾਗਰਿਕਾਂ ਲਈ, ਜਿਨ੍ਹਾਂ ਨੂੰ ਹੁਣ ਆਪਣੀ ਮਾਤ ਭੂਮੀ ਵਾਪਸ ਜਾਣ ਦਾ ਮੌਕਾ ਮਿਲੇਗਾ।

ਇਸ ਦੇ ਨਾਲ ਹੀ ਰਮਜ਼ਾਨ ਦੇ ਅੰਤ ਅਤੇ ਈਦ ਦੀਆਂ ਖੁਸ਼ੀਆਂ ਵਿਚਕਾਰ ਸਾਊਦੀ ਅਰਬ ਨੇ ਵੀ ਈਦ ਦੀਆਂ ਛੁੱਟੀਆਂ ਦਾ ਐਲਾਨ ਕੀਤਾ ਹੈ। ਸਾਊਦੀ ਅਰਬ ‘ਚ ਜਨਤਕ ਖੇਤਰ ਦੇ ਕਰਮਚਾਰੀਆਂ ਲਈ 22 ਮਾਰਚ ਤੋਂ ਛੁੱਟੀਆਂ ਸ਼ੁਰੂ ਹੋ ਗਈਆਂ ਹਨ, ਜਦਕਿ ਨਿੱਜੀ ਖੇਤਰ ਅਤੇ ਗੈਰ-ਲਾਭਕਾਰੀ ਖੇਤਰ ਲਈ ਛੁੱਟੀਆਂ 27 ਮਾਰਚ ਤੋਂ ਸ਼ੁਰੂ ਹੋਣਗੀਆਂ।ਯੂਏਈ ਨੇ ਜਿੱਥੇ ਇਸ ਰਮਜ਼ਾਨ ਵਿੱਚ ਮਨੁੱਖਤਾ ਦੀ ਮਿਸਾਲ ਕਾਇਮ ਕੀਤੀ ਹੈ, ਉੱਥੇ ਹੀ ਪੂਰੀ ਦੁਨੀਆ ਈਦ ਮਨਾਉਣ ਲਈ ਤਿਆਰ ਹੋ ਰਹੀ ਹੈ।