ਲੁਧਿਆਣਾ ‘ਚ ਗਲਾਡਾ ਦੀ ਵੱਡੀ ਕਾਰਵਾਈ, ਇਨ੍ਹਾਂ ਇਲਾਕਿਆਂ ‘ਚੋਂ ਹਟਾਏ ਨਾਜਾਇਜ਼ ਕਬਜ਼ੇ

ਲੁਧਿਆਣਾ: ਮੁੱਖ ਪ੍ਰਸ਼ਾਸਕ ਸੰਦੀਪ ਰਿਸ਼ੀ ਦੀਆਂ ਹਦਾਇਤਾਂ ਅਨੁਸਾਰ ਗ੍ਰੇਟਰ ਲੁਧਿਆਣਾ ਏਰੀਆ ਡਿਵੈਲਪਮੈਂਟ ਅਥਾਰਟੀ (ਗਲਾਡਾ) ਨੇ ਕੁਮਕਲਾਂ ਖੇਤਰ ਅਧੀਨ ਪੈਂਦੇ ਸੇਖੋਵਾਲ, ਸਲੇਮਪੁਰ, ਸਲੇਕੀਆਣਾ, ਹੈਦਰ ਨਗਰ, ਗੜ੍ਹੀ ਫੈਜ਼ਲ ਅਤੇ ਗਰਚਾ ਪਿੰਡਾਂ ਦੀ 300 ਏਕੜ ਤੋਂ ਵੱਧ ਜ਼ਮੀਨ ਤੋਂ ਕਬਜ਼ੇ ਹਟਾਏ ਹਨ। ਇਸ ਦੌਰਾਨ ਗਲਾਡਾ ਟੀਮ ਦੇ ਨਾਲ ਮਾਲ ਵਿਭਾਗ, ਪੁਲਿਸ ਵਿਭਾਗ ਅਤੇ ਪਾਵਰਕਾਮ ਵਿਭਾਗ ਦੇ ਅਧਿਕਾਰੀ ਵੀ ਮੌਜੂਦ ਸਨ।

ਪਹਿਲੇ ਪੜਾਅ ਵਿੱਚ ਲਗਭਗ 180 ਏਕੜ ਜ਼ਮੀਨ ਨੂੰ ਬੀਜੀਆਂ ਫ਼ਸਲਾਂ ਆਦਿ ਦੇ ਕਬਜ਼ੇ ਤੋਂ ਮੁਕਤ ਕਰਵਾਇਆ ਗਿਆ ਹੈ। ਅਪਰੇਸ਼ਨ ਦੌਰਾਨ ਗਲਾਡਾ ਨੇ 06 ਜੇਸੀਬੀ ਮਸ਼ੀਨਾਂ ਅਤੇ 07 ਟਰੈਕਟਰ/ਟਰਾਲੀਆਂ ਸਮੇਤ ਭਾਰੀ ਮਸ਼ੀਨਰੀ ਤਾਇਨਾਤ ਕੀਤੀ। ਅਪਰੇਸ਼ਨ ਦੌਰਾਨ ਗਲਾਡਾ ਨੇ ਉਕਤ ਸਥਾਨ ‘ਤੇ ਅਣਅਧਿਕਾਰਤ ਕਬਜ਼ਿਆਂ ਨੂੰ ਢਾਹ ਦਿੱਤਾ ਅਤੇ ਬੋਰਵੈਲ ਅਤੇ ਮੋਟਰਾਂ ਨੂੰ ਉਖਾੜ ਦਿੱਤਾ। ਪੀਐਸਪੀਸੀਐਲ ਵਿਭਾਗ ਵੱਲੋਂ ਅਣਅਧਿਕਾਰਤ ਬਿਜਲੀ ਕੁਨੈਕਸ਼ਨ ਵੀ ਕੱਟ ਦਿੱਤੇ ਗਏ।