ਪੰਜਾਬੀ
ਟਰੈਫਿਕ ਜਾਮ ਅਤੇ ਹਾਦਸਿਆਂ ਕਾਰਨ ਦੱਖਣੀ ਬਾਈਪਾਸ ‘ਤੇ ਜਵੱਦੀ ਕੱਟ ਫਿਰ ਬੰਦ
ਲੁਧਿਆਣਾ : ਆਮ ਆਦਮੀ ਪਾਰਟੀ ਦੇ ਵਿਧਾਇਕ ਗੁਰਪ੍ਰੀਤ ਸਿੰਘ ਗੋਗੀ ਨੇ ਦਸ ਦਿਨ ਪਹਿਲਾਂ ਦੱਖਣੀ ਬਾਈਪਾਸ ‘ਤੇ ਜਵੱਦੀ ਕੱਟ ਖੋਲ੍ਹਿਆ ਸੀ। ਮਾਹਿਰਾਂ ਅਨੁਸਾਰ ਕੱਟ ਖੁੱਲ੍ਹਣ ਨਾਲ ਦੱਖਣੀ ਬਾਈਪਾਸ। ਤੇ ਹਾਦਸੇ ਤੇ ਜਾਮ ਲੱਗ ਸਕਦਾ ਹੈ ਪਰ ਵਿਧਾਇਕ ਲੋਕਾਂ ਦੀ ਮੰਗ ਦਾ ਹਵਾਲਾ ਦੇ ਕੇ ਇਸ ਨੂੰ ਜਾਇਜ਼ ਠਹਿਰਾ ਰਹੇ ਹਨ। ਕੱਟ ਖੋਲ੍ਹਦੇ ਹੀ ਦੱਖਣੀ ਬਾਈਪਾਸ ‘ਤੇ ਟ੍ਰੈਫਿਕ ਜਾਮ ਹੋ ਗਿਆ ਅਤੇ ਕਈ ਵਾਹਨ ਹਾਦਸਾਗ੍ਰਸਤ ਹੋਣੇ ਸ਼ੁਰੂ ਹੋ ਗਏ।
ਵਾਰ-ਵਾਰ ਹੋ ਰਹੇ ਹਾਦਸਿਆਂ ਅਤੇ ਟ੍ਰੈਫਿਕ ਜਾਮ ਕਾਰਨ ਪ੍ਰਸ਼ਾਸਨ ਨੇ ਫਿਰ ਤੋਂ ਜਵੱਦੀ ਕੱਟ ਨੂੰ ਬੰਦ ਕਰ ਦਿੱਤਾ ਹੈ। ਵਿਧਾਇਕ ਗੁਰਪ੍ਰੀਤ ਗੋਗੀ ਨੇ ੧੧ ਅਪ੍ਰੈਲ ਨੂੰ ਜਵੱਦੀ ਕੱਟ ਖੋਲ੍ਹਿਆ ਸੀ। ਵਿਧਾਇਕ ਨੇ ਕਿਹਾ ਸੀ ਕਿ ਇਸ ਕੱਟ ‘ਤੇ ਹਾਦਸਿਆਂ ਤੋਂ ਬਚਣ ਲਈ ਸਪੀਡ ਬ੍ਰੇਕਰ ਬਣਾਏ ਜਾਣਗੇ ਅਤੇ ਨਾਲ ਹੀ ਟ੍ਰੈਫਿਕ ਸਿਗਨਲ ਵੀ ਲਗਾਏ ਜਾਣਗੇ। ਇੰਨਾ ਹੀ ਨਹੀਂ, ਉਨ੍ਹਾਂ ਇਥੇ ਪੁਲਸ ਮੁਲਾਜ਼ਮ ਦੀ ਪੱਕੀ ਤਾਇਨਾਤੀ ਦੀ ਗੱਲ ਵੀ ਕਹੀ। ਪਰ ਅਜਿਹਾ ਕੁਝ ਵੀ ਨਹੀਂ ਹੋਇਆ ਅਤੇ ਅਕਸਰ ਹਾਦਸੇ ਅਤੇ ਟ੍ਰੈਫਿਕ ਜਾਮ ਹੁੰਦੇ ਸਨ।
ਕਈ ਲੋਕਾਂ ਨੇ ਵਿਧਾਇਕ ਗੁਰਪ੍ਰੀਤ ਗੋਗੀ ਨੂੰ ਦੁਬਾਰਾ ਕੱਟ ਬੰਦ ਕਰਨ ਲਈ ਕਿਹਾ। ਜਾਣਕਾਰੀ ਮੁਤਾਬਕ ਵਿਧਾਇਕ ਨੇ ਪ੍ਰਸ਼ਾਸਨ ਨੂੰ ਦੁਬਾਰਾ ਕੱਟ ਬੰਦ ਕਰਨ ਲਈ ਕਿਹਾ, ਜਿਸ ਤੋਂ ਬਾਅਦ ਪ੍ਰਸ਼ਾਸਨ ਨੇ ਬੁੱਧਵਾਰ ਨੂੰ ਇਹ ਕੱਟ ਬੰਦ ਕਰ ਦਿੱਤਾ। ਟ੍ਰੈਫਿਕ ਮਾਹਰ ਰਾਹੁਲ ਵਰਮਾ ਨੇ ਦੱਸਿਆ ਕਿ ਇਸ ਕੱਟ ਦੇ ਖੁੱਲ੍ਹਣ ਕਾਰਨ ਬਹੁਤ ਸਾਰੇ ਹਾਦਸੇ ਵਾਪਰ ਰਹੇ ਸਨ। ਉਨ੍ਹਾਂ ਕਿਹਾ ਕਿ ਬੁੱਧਵਾਰ ਨੂੰ ਜਿਵੇਂ ਹੀ ਕੱਟ ਬੰਦ ਹੋਇਆ, ਉੱਥੇ ਆਵਾਜਾਈ ਆਮ ਹੋ ਗਈ।
