ਖੇਤੀਬਾੜੀ
ਫਲ਼ ਤੇ ਸਬਜ਼ੀਆਂ ਨੂੰ ਦੋ ਮਹੀਨੇ ਤਕ ਸੁਰੱਖਿਅਤ ਰੱਖੇਗਾ ਇਹ ਕਿਫਾਇਤੀ ਕੂਲ ਚੈਂਬਰ, ਪੀਏਯੂ ਨੇ ਕੀਤਾ ਤਿਆਰ
ਲੁਧਿਆਣਾ : ਦੇਸ਼ ਵਿੱਚ ਵਾਢੀ ਤੋਂ ਬਾਅਦ ਸਟੋਰੇਜ ਦੀਆਂ ਢੁਕਵੀਆਂ ਸਹੂਲਤਾਂ ਦੀ ਅਣਹੋਂਦ ਵਿੱਚ ਲਗਭਗ ਤੀਹ ਤੋਂ ਪੈਂਤੀ ਪ੍ਰਤੀਸ਼ਤ ਫਲ ਅਤੇ ਸਬਜ਼ੀਆਂ ਖਪਤਕਾਰਾਂ ਤੱਕ ਪਹੁੰਚਣ ਤੋਂ ਪਹਿਲਾਂ ਹੀ ਖਰਾਬ ਹੋ ਜਾਂਦੀਆਂ ਹਨ। ਇਸ ਕਾਰਨ ਕਿਸਾਨਾਂ ਨੂੰ ਭਾਰੀ ਆਰਥਿਕ ਨੁਕਸਾਨ ਝੱਲਣਾ ਪੈ ਰਿਹਾ ਹੈ।
ਇਸ ਨੂੰ ਰੋਕਣ ਲਈ, ਪੰਜਾਬ ਐਗਰੀਕਲਚਰਲ ਯੂਨੀਵਰਸਿਟੀ (ਪੀ.ਏ.ਯੂ.) ਨੇ ਭਾਰਤੀ ਖੇਤੀ ਖੋਜ ਪ੍ਰੀਸ਼ਦ, ਨਵੀਂ ਦਿੱਲੀ ਦੇ ਸਹਿਯੋਗ ਨਾਲ ਫਲਾਂ ਅਤੇ ਸਬਜ਼ੀਆਂ ਨੂੰ ਸੁਰੱਖਿਅਤ ਰੱਖਣ ਲਈ ਇੱਕ ਬਹੁਤ ਹੀ ਘੱਟ ਲਾਗਤ ਵਾਲਾ ਕੂਲ ਚੈਂਬਰ ਤਿਆਰ ਕੀਤਾ ਹੈ। ਇਹ ਕਟਾਈ ਤੋਂ ਬਾਅਦ ਫਲਾਂ ਅਤੇ ਸਬਜ਼ੀਆਂ ਦੀ ਗੁਣਵੱਤਾ, ਤਾਜ਼ਗੀ ਅਤੇ ਜੀਵਨ ਕਾਲ ਨੂੰ ਬਣਾਈ ਰੱਖਣ ਵਿੱਚ ਮਦਦ ਕਰੇਗਾ। ਖਾਸ ਗੱਲ ਇਹ ਹੈ ਕਿ ਇਸ ਚੈਂਬਰ ਲਈ ਬਿਜਲੀ ਦੀ ਕੋਈ ਲੋੜ ਨਹੀਂ ਹੈ ਅਤੇ ਇਸ ਨੂੰ ਬਿਨਾਂ ਬਿਜਲੀ ਦੀ ਖਪਤ ਕੀਤੇ ਖੇਤ ਵਿੱਚ ਚਲਾਇਆ ਜਾ ਸਕਦਾ ਹੈ।
ਕਿਸਾਨ ਸਥਾਨਕ ਸਮੱਗਰੀ ਦੀ ਵਰਤੋਂ ਕਰਕੇ ਆਪਣੇ ਖੇਤ ਜਾਂ ਘਰ ਵਿੱਚ ਲਗਭਗ 100 ਕਿਲੋ (1 ਕੁਇੰਟਲ) ਦੀ ਸਮਰੱਥਾ ਵਾਲੇ ਇਸ ਚੈਂਬਰ ਨੂੰ ਤਿਆਰ ਕਰ ਸਕਦੇ ਹਨ। ਵਿਗਿਆਨੀਆਂ ਦਾ ਕਹਿਣਾ ਹੈ ਕਿ ਕਿਸਾਨਾਂ ਦੇ ਨਾਲ-ਨਾਲ ਛੋਟੇ ਸਬਜ਼ੀਆਂ ਅਤੇ ਫਲ ਵਿਕਰੇਤਾਵਾਂ ਨੂੰ ਚੈਂਬਰ ਦਾ ਫਾਇਦਾ ਹੋਵੇਗਾ।
ਪੀਏਯੂ ਐਗਰੀਕਲਚਰਲ ਇੰਜਨੀਅਰਿੰਗ ਦੇ ਪ੍ਰਮੁੱਖ ਵਿਗਿਆਨੀ ਡਾ: ਜਗਦੀਸ਼ ਗਰੋਵਰ ਅਤੇ ਭੂਮੀ ਵਿਗਿਆਨੀ ਡਾ: ਸੁਖਵਿੰਦਰ ਸਿੰਘ ਅਨੁਸਾਰ ਬਿਨਾਂ ਬਿਜਲੀ ਕੂਲ ਚੈਂਬਰ ਵਾਸ਼ਪੀਕਰਨ ਰਾਹੀਂ ਠੰਢਾ ਹੋਣ ਦੇ ਮੂਲ ਸਿਧਾਂਤ ‘ਤੇ ਕੰਮ ਕਰਦਾ ਹੈ, ਜੋ ਤਾਪਮਾਨ ਨੂੰ ਘਟਾਉਂਦਾ ਹੈ। ਉਪਜ ਵਿੱਚ ਨਮੀ ਦੀ ਮਾਤਰਾ ਨੂੰ ਵਧਾ ਕੇ, ਇਹ ਉਪਜ ਦੇ ਅੰਦਰੂਨੀ ਬਾਇਓਕੈਮੀਕਲ ਪ੍ਰਤੀਕ੍ਰਿਆਵਾਂ ਦੇ ਕਾਰਨ ਹੋਣ ਵਾਲੇ ਨੁਕਸਾਨ ਨੂੰ ਘਟਾਉਂਦਾ ਹੈ।
